Святитель Иннокентий Херсонский

 

 

 

 

 Тропари, кондак, молитва и акафист святителю Иннокентию (Борисову), архиепископу Херсонскому (†1857)
 
sobor_voronezh
September 15th, 2010 Тропарь, глас 4

От юных лет прилежа учению благочестия и страху Божию, / во благодати Христовой преуспевая, / стяжал еси словесная дарования / и явился еси неутомимый проповедниче спасения, / души верных озаряя спасительными смыслы / и приводя всех ко исправлению.

/ Святителю отче Иннокентие, / моли Христа Бога // дати нам оставление грехов и велию милость.

 

Ин тропарь, глас 4

Днесь град Херсонский радуется, веселится земля Таврическая, имуще молитвенника святителя Христова Иннокентия, пастыря добра и праведника изряднаго, иже Божия Матери образ Касперовский прославил еси, в крае новорусском веру правую утвердил еси. Темже святителю отче Иннокентие, моли Христа Бога, спастися душам нашим.

 

Кондак, глас 3:

Юга земли нашея цвете, / Церкве Российския украшение, / Православия наставниче преславный, / защитниче и молитвенниче Отечества усердный, / новый Российский Златоусте, / богомудре святителю Иннокентие, / моли Христа Бога // спастися душам нашим.

Молитва
О, всезлатая уста слова, всехвальный и всечестный архиерее, святителю Христов Иннокентие! Ты многая и различная дарования от Господа приял еси, и яко раб благий и верный вся данная тебе таланты добре умножил еси, и всеми же сими Церкве Христовой и Отечеству славне послужил еси. Ныне же велие на небесех имея дерзновение ко Святей Троице, призри милостивно от обителей горних на нас немощных, грехами многими обремененных. Умоли Господа Вседержителя, яко да отвратит от нас гнев Свой, праведно по делом нашим на ны движимый и обратит нас на путь покаяния.

Богоненавистное же заблуждение языческое, зловредное нечестие агарянское, вся ереси богохульныя, расколы, от единыя Церкве отчуждающия да истребит, и да избавит ны от соблазнов мира и козней диавольских. Ей, крепкий столпе церковный, сосуде благодати предъизбранный, испроси от Отца светов, да соблюдет нас от нечестивых и душепагубных лжеучений, неверия и суеверий, умудрит и укрепит ны даже до конца ко хранению веры Православныя, сохранит малое стадо Свое неразсеянное пребыти в любве и единомыслии по образу Святыя и Нераздельныя Троицы. Неверныя к познанию истины да обратит, да подаст пастырем Церкве примерную святость и святую ревность о спасении пасомых, монашествующим в подвизе укрепление, миру умирение, земли нашея от нахождения иноплеменных, от крамолы и нестроений сохранение. О, ходатаю теплый, пречудный Иннокентие, испроси от Бога нам время на покаяние и жития нашего исправление; во всех нуждах, скорбех и искушениях скорое поможение, терпение же и укрепление, и согрешений прощение. Испроси всяк дар, коемуждо благопотребен, яже ко спасению, и от вечных мук и огня геенскаго избавление. Тако да благодатию и человеколюбием в Троице покланяемаго Бога сподобимся наследники быти Царствия Небеснаго, да прославляем вкупе с тобою всех благих Подателя, Триединаго Бога, Отца и Сына и Святаго Духа, ныне и присно и во веки веков. Аминь.

Акафист святителю Иннокентию (Борисову), архиепископу Херсонскому
Службу совершаем по Минее общей, главе 10: Служба святителю единому.

Свят. Иннокентию есть служба и акафист. Акафист у себя указывал: http://ustavschik.livejournal.com/84346.html,
Источник:http://sobor-voronezh.livejournal.com/37935.html.